زمان وكت العصير ينزل
كنا هناك نقيف ننجم
كنا كتار صغار وكبار
لا شلنالنا يوماً هم
وضل الحيطة ساعة الحر
يضاير فينا مانتلم
وفي الزاوية المقابلة الزير
كبابي الشاي بتتلطم
زمن مشتول بروعة ناس
تلاقي الخال وود العم
خيال إحساسنا لسة صغير
نعيش رغم الجفاف ننعم
نهاظر دا ونشاغل دا
ورغم أحزاننا نتبسم
مصير البسمة هي الباقية
وباكر جد حنتعلم
وطن مليان محبة وشوق
صحيح اطرافو تتألم
صحيح انك مكندك سوس
يقرض فيك شان يشحم
ويطلع من وجعنا الصوت
يقاطع في سنين الغم
لا حراس يمسكوا الايد
لا أصوات بتتبكم
وتاني بقيف وبتكلم
ضميرنا الراح وسط غابات
وليل الوجعة دا الضلم
بدل مايدق نغم طمبور
طفلة صغيرة تتيتم
فراش ممدود في حضن الخوف
وزهرة جميلة تتلغم
تشوف النحلة فوق السور
بدل ماتجيب عسل في اليوم
بقت تنزف بدالو الدم
ويبدأ نهار طويل وتعيس
نلاقي الكل مرق للهم
متين يارب ..
نشيل من روحنا هم الدور
متين نرجع عشان نتلم
نلاقي الدنيا كلها نور
[center]